اريد ارثيك ياهذا العراق الميت المردود
مجتول الوطن مجتول والجتال دوره بكل وكت موجود
والماله أهل فجار دمه ايضيع مايبجن عليه زينات ويلبسن اهدوم السود
وبن اهلك وين اشو مشو عنك شوخلوك بضع والدرب مسدود
مادفنوك مادفنوك مادفنوك بس خلوك جثة والتم عليها الدود
جابولك جفن ومن كل زيج ركعةالنوب ومدوه على طولك بلجي يرهم عود
ترى جنازك الشامت صارودفانك ترى الفرهود
بعز الصيف صلبوك بمنايرهم ثلج على العود
بلجي اتذوب بلجي اتموع بلجي من المراجل تهجع وكافي وتجن وتهود
اهم رادو يموتونا غصب والناس كلها اشهود
ياعيط النخل يامتعب الصاعود ياشمس الظهر يالما تلمه حدود
اهم رادو يكطعونك فخاذ اجتاف وكلمن يخاذ بكيفة سهم ويعود
لكن هاي ماترهم ابد ما تصيرماطول المراجل ترجفلها ازنود
مايدرون هذا ابن العراقية لو يغتاض يطيح من السما طراجيع سود
شبعنا من الوعود اوعود اكلنا اوعود شربنا اوعود لبسنا اوعود
وياهو اليجي علينا يتجنكل يصعد ونمرود
ديمقراطيتك يخايب وين اشو بس الوميض وريحة البارود
تسمينا وطن عربان واشجباك على العربان يا بن أم الربعه ايهود
سكتنا ومو جبن والله ردنا انشوف حدك وين حتى احنا انحطلك بالمكان حدود
خليت الوطن للرايح وللجاي خان اجغانشله واعبر بكيفك على المكرود
تقسيم العراق كلي هاي اشلون اتصير وكلي اشلون ترهم عود
لولا تمرة البصرة لبن اربيل مايطلع بدره ويخضى الجود
ولولا كيمر السدة عسل سليمانية ماينباع شرط الضوك مامردود
موكلتو الحرية لكل انسان عايش بالعراق بلا سجن وقيود
جا هذا الجتل بالناس شتسميه تحرير وأمن مفقود
لو هذا الانفصال الا تظن ايصير حشدولة من الاعلام احشود
ومن الله خلقنا بهالوطن عرب واكراد اقليات شتل اورود
ما نخلص وحق الله مانخلص رغم هاي المقابر وبشفل حفروانا الحود
شافونا مثل بير زمزم مانقص فد يوم كلما اخذو من مايه يرد ايزود
وغيرتنا اجت من غيرة العباس ماهد العلم من كطعولو ازنود
ماتمحل وحك الله ماتمحل ماطول دجلة والفرات الخير يركض ويطرد الصيهود
ولك هذا الوطن بيه الحسين ينام يامنى حرامي اشيل كشة عود
ورك هذا عراق المرتضى الكرارصلى الله عليه وكرمة بالجود
ومن زاخو لحد الفاو هذا الوطن واحد مايصير اثنين وشعلينا لو نبحت اجلاب السود
يالك تلعب بذيلك عليه واتزود تعرفهم اهلنا بثورة العشرين والمكوار بعد بمتحفك موجود
ولجمن لجمن بيد ضاري الشيخ صبح بالسراي من الصبح مصيود
خلينا بحجينا اليوم يمتى اتشيل دبابات وتطلع بلا مطرود
لو حلتلك الكعد بالفلوجة والموصل يابن الناس وكل يوم الرتل منا همر مفقود
