جنت اتمشه براس الشارع
ومرت يمي وجنهه اغزيله
باوعت الهه اني ومتعجب
ياربي المن هاي الطفله
التمو يمهه الناس وتسال
انت امنين اهلج يم كحله
طاحت كحلتهه ويه الدمعه
وكالت احنه من اهل الحله
جيت اني وامي واخواني
نزور الكاظم يوم الجمعه
ومن وصلينه لجسر الدوره
كام ايسوق الوالد سرعه
كالتله امي اشعندك مسرع
كال هنا ذبحو ابو جمعه
وذبحو وياه سيد حسين
وطاحت من عين امي الدمعه
ومن وصلينه اكبال المصفى
طلع ارهابي اوياه سبعه
مابيهم رحمه ولانور
لاهم شيعه ولاهم سنه
بيهم واحد جنه افغاني
يحجي عربي بس ابلكنه
سئلو كالو من يامذهب
كال الوالد.....حبنه لدين الرب مذهبنه
كالو ندري بس يامذهب
شيعه انتم احجو لوسنه
سكت الوالد......كلهم قبلتنه احنه الكعبه
وبالباري الخالق امنه
نب واحد منهم متكتر
كال احسن شى خل نكتلهم
نب الثاني خاف الطلقات اتريحهم
نب الثلث خل انفذ حكم المفتي
وبالسيف الباشط نذبحهم
واختار ايعدمونه اعدام
وحضنتني امي وطاحت فوكي
وماتو كلهم ظليت انه
واتمنيت وياهم موتي
يل تسئلني اعليمن تسال
ماظل واحد يسمع صوتي
لاام ادفيني بليلي
ولااب يمسح دمعة عيني
ولاواحد احجيله اهمومي
وعن هم هلدنيه ايسليني
من صغري الهم حطم كلبي
ومحتاره اشلون اكظي اسنيني
هايه انه وقصتي ويه الدنيه
يل التسال حجيك ياذيني
