هذولة طيور فجرتهم ليش
وحمامات السلام شبيك تذبحهن
ذيجة الناس تزع بلحديقة ورود
واحنا بمكبرة الوردات نزرعهن
مثل شدت ورد واطشرن على الكاع
ولان ميت ضميرك ردت تسحكهن
ذني ورود جنه وبارض بغداد
ما تعرف تشمهن ليش تكطعهن
مسيحيات ماتن بس عراقيات
وكف دمع الصليب بعين مريمهن
اشك الفجروهن مو عراقين
اوهام على الحقيقة وردت ارهمهن
بس موقف هضمني وهز ظمير الكون
واحد دنت نفسه وباك معضدهن
انا الجنت يمهن شاهد على الصار
شك زيجة الرصيف وظم كصايبهن
انحنه شايب عليهن جسمه كله جروح
طلع هذا العراقي يصير والدهن
صرخ ذني بنات مكشفات شلون
جيب الخارطة يحسين نسترهن
خرز من نور ذني شلون ملظومات
دمهن خيط نور والله لاظمهن
ذني اجمل كلادة بركبة التاريخ
وبصدرة العراقي انواط علكهن
عليهن جامعتهن تنشد الدفان
ذني بلاية جثة شلون تدفنهن
ولا مثل الهواجس تجي لبعض الناس
هواجس اجتني وردت انصفهن
صورة بطن صورة اتعب الرسام
لاكن عيب اتعب واني شاعرهن
مو بس بقطعة سودة ونكتب استنكار
لازم قطعة بيضة وكون ربطتهن
امهن تنتضرهن عينهة على الباب
وبس تابوت اجاها شلون حال امهن
عزرائيل يمهن لحضت التفجير
خجل من شاف ضلهن كام يسترهن
انتة وابن لادن ما اكول جلاب
ما ترضة الجلاب العار يلحكهن
